Matemáticas na horta

Hoxe, na hora de matemáticas estivemos na horta de novo. Nesta ocasión non plantamos, nin regamos, nin arrincamos herbas.
Medimos os barrotes que lle estacamos aos tomates e a superficie adicada a patacas e leitugas, así como o perímetro do tallo das leitugas, pois queriamos poñer un cordel de protección.
Medimos, calculamos e observamos.
Observamos as liñas paralelas das filas de leituga, tomates, pementos, patacas, verdura, chícharos, cebolas e amorodos. A perpendicular destas fileiras cos regos polos que camiñamos.
Observamos os ángulos rectos das estacas das xudías en relación co chan, e os ángulos agudos dos barrotes dos tomates que colocamos en estrutura triangular, que, como ben sabemos, é máis estable.
Así é que fixemos un bo repaso das matemáticas ... na horta.